O VILLA
Macché desvalixâ! M'àn dæto st'angæzo chì assemme a-o giornale! Sciâ l'ammïe chì: 'na revista pe-e dònne.

O FASCE
Bella! Tutta lùcida, à colori! Oh, sciâ l'à visto che mäveggia sto taieurin?

O VILLA
Spiritoso!.. Mi ghe l'ò dïto a-o giornalâ: "Sta revista a no m'interessa. Sciâ me vedde, no? Son masccio".

O FASCE
E lê?

O VILLA
"Ô veddo ben" - o m'à respòsto - "ma mi devo véndighela pe fòrsa". E no gh'è stæto ninte da fâ. Se ò vosciùo o giornale, o dovùo accattâ o supplemento. 

O FASCE 
E stùddian pròpio tutte pe fâne straggiâ di dinæ. Va ben, sciâ no se â pigge, sciâ pense a-a salute.

O VILLA
Bonn-a quella! Me sento tutto affreidoïo e me bruxa a göa.

O FASCE
Belinate! Sciâ va da-o speçiâ in sciô canto e sciâ se piggia 'na bella aspirinn-a. 

O VILLA
No ghe penso manco! 

O FASCE
E perché?

O VILLA 
À l'uso di tempi che semmo, pe avei 'n'aspirinn-a de segùo
doviò accattâ anche un pacco de assorbenti igiénichi!

O FASCE
Va ben, sciâ l'arve un pò sto giornale, che veddemmo cöse gh'è de neuvo... Segnô, fra giornale e supplemento quante pappê straggiòu! Che delitto, consummâ tutta quella cellulite!

O VILLA
Cellulosa, Fasce, cellulosa! A cellulite a l'è quella che gh'à tutte e concorrente de Miss Italia, meschinette! Gh'è scrïto chì.

O FASCE
Ah scì, me sbaliava. Però à mi m'andievan ben anche co-a cellulite. Mentre invece,'n açidöro, quelle pöche vòtte...

O VILLA
Quante?

O FASCE
Unn-a ò doe à l'anno, dìmmoghe... no semmo miga ciù di sgarzoelin! Quelle pöche votte, dixeiva, 'na dònna me tocca andâmela à çercâ in corso Aurelio Saffi.

O VILLA
E òua sciâ no gh'andià ciù manco quelle doe vòtte, se sciâ no veu ëse denonsiòu.

O FASCE
Ma comme?!

O VILLA
Sciâ lëze: "I clienti delle prostitute denunciati".

O FASCE
Ma comme? A prostituçion a l'è lìbera e i clienti végnan denonsiæ?

O VILLA
Pròpio coscì. Do resto fan coscì anche pe-e sigarette. E véndan liberamente, però fan de tutto pe no fâte fummâ.

O FASCE 
No capiscio...

O VILLA
Sciâ raxonn-e: à sto ponto se sciâ foïse unn-a de quelle dònne comme sciâ se regolieiva?

O FASCE
Me tocchieiva cangiâ mestê...

O VILLA
Regolare: e te lì che s'eliminieiva, da 'n giorno à l'ätro, a ciaga da prostituçion!

O FASCE
Che drïtaia! Ma, sciâ me spieghe, pe quæ motivo o cliente o vegne denonsiòu?
 

O VILLA
Perché dìxan ch'o favoisce a prostituçion.

O FASCE
Ah, ma allöa pe mi no gh'è peigo. Quande vaddo in corso Aurelio Saffi son sempre mi quello ch'o vegne favorïo: a mæ donnetta no solo a me fa spende pöco, ma in sciô ciù bello a l'à anche tanta de quella paçiensa!